ދިވެހި ފަނޑިޔާރުންގެ ޖަމްޢިއްޔާގެ ތަޢާރުފު

ދިވެހި ފަނޑިޔާރުންގެ ޖަމްޢިއްޔާއަކީ، ޤާނޫނު ނަންބަރު 2003/1 (ޖަމްޢިއްޔާތަކާބެހޭ ޤާނޫނު) ގެ ދަށުން 2008 މެއި 14 ވަނަ ދުވަހު ރަޖިސްޓްރީ ކޮށްފައިވާ ޖަމްޢިއްޔާއެކެވެ. މިޖަމްޢިއްޔާގެ މަޤްޞަދުތައް ތިރީގައި މިވަނީއެވެ.

1. ޢަދުލުއިންސާފު ޤާއިމުކުރުމާއި، ޝަރީޢަތް ކުރުމުގައި ދިމާވާ ދަތިތައް ފާހަގަ ކޮށްއެކަން، ކަމާއި ބެހޭފަރާތްތަކަށް ހުށަހެޅުން.
2. ފަނޑިޔާރުންގެ ހޭލުންތެރިކަން އިތުރުކުރުމަށާއި ފަނޑިޔާރުންނަކީ އެމީހުންގެ މަސައްކަތަށް ގާބިލު ބައެއްގެ ގޮތުގައި ދެމިތިބުމަށްޓަކައި އެކިއެކި ޕުރޮގުރާމްތައް ރާވައި ހިންގުން.
3. ޝަރުޢީ ދާއިރާ އާއި މެދުގައި ޢާންމުންގެ ޙޭލުންތެރިކަން އިތުރުކުރުމަށާއި، އަދި ޝަރުޢީ ދާއިރާއާއި މެދުގައި ޢާންމުންގެ އިތުބާރު ދެމެހެއްޓުމަށް މަސައްކަތްކުރުން.
4. ފަނޑިޔާރުންގެ ޙިމާޔަތާއި މިނިވަން ކަމާއި ރައްކާތެރިކަމަށް މަސައްކަތް ކުރުން.
5. ފަނޑިޔާރުންގެ މެދުގައި އެއްބައިވަންތަކަން އުފައްދައި، އެކުވެރިކަމާއި، އެއްބާރުލުން އިތުރުކޮށް އާލާކުރުމަށް މަސައްކަތްކުރުން.
6. މިޖަމްޢިއްޔާގެ މަޤުސަދުތައް ޙާސިލު ކުރުމަށްޓަކައި ރާއްޖެއާއި ރާއްޖެއިން ބޭރުގެ ޖަމްޢިއްޔާ ޖަމާޢަތްތަކާއި ގުޅިގެން މަސައްކަތްކުރުން.

ދިވެހި ފަނޑިޔާރުންގެ ޖަމްޢިއްޔާއަކީ ހަމައެކަނި ފަނޑިޔާރުންގެ މައްޗަށް އެކުލެވިގެންވާ ޖަމްޢިއްޔާއެކެވެ. ފަނޑިޔާރުންގެ ޖަމްޢިއްޔާގެ ޢަމަލީ މަސައްކަތް ފެށުމަށްފަހު، 2010 އޮގަސްޓް 10 ވަނަ ދުވަހު، ޤާނޫނު ނަންބަރު 2010/13 (ފަނޑިޔާރުންގެ ޤާނޫނު) އަށް ޢަމަލު ކުރަން ފެށުނެވެ. މި ޤާނޫނުގެ 10 ވަނަ މާއްދާގައި ފަނޑިޔާރުންނަށް ޖަމްޢިއްޔާ ޖަމާޢަތް ހެދުމުގެ ޙައްޤު ލިބިގެންވާކަން ބަޔާންކޮށްފައިވެއެވެ. އަދި ފަނޑިޔާރުންގެ ޤަދަރާއި ހައިބަތު ދެމެހެއްޓުމަށްޓަކައި އެއްވަގުތެއްގައި ރަޖިސްޓްރީކޮށް ހިންގާނީ އެއް ޖަމްޢިއްޔާ ކަމަށްވެސް އެ މާއްދާގައި ބަޔާން ކޮށްފައިވެއެވެ.

ދިވެހި ފަނޑިޔާރުންގެ ޖަމްޢިއްޔާއަކީ، މި ވަގުތު ރާއްޖޭގައި މަސައްކަތްކުރާ ފަނޑިޔާރުންގެ 90 އިން ސައްތަ އަށްވުރެ ގިނަ ފަނޑިޔާރުން ތަމްސީލު ކުރާ ޖަމްޢިއްޔާއެކެވެ.